Dapat ba o Hindi dapat maging batayan ng pagsasamahan ng mag-asawa ang pagkakaroon ng anak?

(Maikling sanaysay)

 

          Sa pag-aasawa ay kinakailangan ng mahabang oras at panahon para pagplanohan ito ng mabuti. Hindi madali ang tinatawag na “pag-aasawa”, dahil kapares nito ang pagiging responsibilidad, pagiging tapat sa isa’t isa at pagsasama sa hirap man o sa saya. Sila ay humarap sa Poong Maykapal na ngangakong aalagaan at magmamahalan ng habang buhay. Ang lalaki ay tinatawag na haligi ng tahanan, dahil siya ang magpapatibay ng pagmamahalan sa pamilya, habang ang babae naman ay tinatawag na ilaw ng tahanan dahil siya ang magbibigay ng liwanag at pag-asa sa tahanan. Ang anak naman ang nagbibigay kulay sa pamilya, dahil siya ang simbolo ng wagas na pagmamahalan ng kanyang magulang. Ngunit paano kung hindi mabigyan ng anak ang isang mag-asawa. Matatawag pa bang pamilya kung walang anak? May katuturan ba ang pagsasama ng mag-asawa gayung wala naman silang anak? Halika kaibigan, alamin natin ang tungkol sa pag-aasawa kung dapat ba o hindi dapat maging batayan ng pagsasamahan ng mag-asawa ang pagkakaroon ng anak?

          Ang anak ay hindi mawawala sa pagbuo ng pamilya, dahil ito ang magbubuklod ng pagiging matiwasay na pagsasama ng mag-asawa. Kahit isa, dalawa o tatlong anak ay sapat na upang tawagin itong isang buong pamilya. Karamihan ay ang mga lalaki ang nangangarap na magkaroon ng anak sa kanilang babaeng minamahal. Dito ay ipapasa nila ang kanilang apelyido sa kanilang anak at magpapatuloy na palawakin at paramihin ang angkan. Ngunit mayoon din ibang mag-asawa na hindi pa nabibigyan ng anak at ang maaaring dahilan ay baka baog ang lalaki o ‘di kaya’y may problema sa matris ang babae, kung kaya hindi sila nagkaanak. Ang dahilan ng iba naman ay hindi pa nila gustong magkaanak. Katulad ng isang youtuber na si Cathlaine at ang kanyang asawang amerikano na halos labindalawang taon na nagsasama ay hindi pa sila nagkakaroon ng anak. Ayon sa kanila ay hindi pa nila ito iniisip dahil sinusulit pa rin nila ang buhay ng magkasama na kahit walang anak. Hindi lamang nag-iisa sina Cathlaine kundi iba ring mga mag-asawa na pinili ang hindi muna pagkakaroon ng anak. Nagpapatuloy pa rin sila sa pagsasama kahit walang anak at hindi basehan upang masira ang kanilang relasyon.

          Ang pagsasama ng mag-asawa ay dapat pinapahalagahan at kahit anumang mangyari ay hindi dapat sumuko sa isa’t isa. Hindi kailangan iwanan ang asawa at hindi solusyon ang paghahanap ng ibang babae o lalaki upang mabigyan lamang ng anak. Ang salitang “kasal” ay sagrado at nagsumpaan sa harap ng Diyos na kahit sa hirap man o sa ginhawa ay walang susuko at kahit walang anak ay maituturing pa rin na pamilya, dahil sila ay kasal sa Diyos. May katuturan pa rin ang pagsasama ng mag-asawa kahit walang anak at hindi dapat pairalin ang sariling kagustuhan na magkaanak sa paraang maghahanap ng iba. Kapag mahal mo ang isang tao ay hindi mo ito ipagpapalit sa kahit kanino man at ang totoong nagmamahalan ay nagsasama habang buhay at hindi dapat isipin ang sasabihin ng ibang tao.